Plan Vendor i Integritetit është rezultat i angazhimit të Bashkisë Konispol për të forcuar transparencën, llogaridhënien dhe etikën në qeverisjen vendore. Dokumenti është hartuar me kontributin e grupit të punës së Bashkisë Konispol si edhe me mbështetjen e anëtarëve të Këshillit Bashkiak Konispol,
Përmbajtja e këtij plani pasqyron analizat, vlerësimet dhe rekomandimet profesionale të përgatitura me kujdes dhe përkushtim, me qëllim ngritjen e mekanizmave të brendshëm për mbrojtjen e integritetit institucional dhe parandalimin e praktikave të cenueshme ndaj tij. Ky dokument synon të shërbejë si një udhërrëfyes praktik për administratën vendore dhe aktorët lokalë në përmirësimin e qeverisjes publike në Bashkinë Konispol.
Në vijim të këtij angazhimi, Plani i Integritetit parashikon masa konkrete për forcimin e kulturës institucionale të ndershmërisë dhe përmirësimin e performancës në ofrimin e shërbimeve publike. Ai identifikon zonat me risk të lartë për korrupsion dhe propozon ndërhyrje të posaçme për të rritur efikasitetin, transparencën dhe besimin e qytetarëve ndaj administratës vendore. Nëpërmjet këtij dokumenti, Bashkia Konispol angazhohet për një qeverisje të hapur dhe të ndershme, në shërbim të interesit publik.
Gjithashtu, Plani nxit përfshirjen aktive të qytetarëve dhe shoqërisë civile në proceset vendimmarrëse, duke promovuar një mjedis ku përgjegjshmëria dhe integriteti janë parime udhëheqëse. Zbatimi i suksesshëm i këtij plani do të kërkojë bashkëpunim të ngushtë ndërmjet institucioneve vendore, stafit administrativ dhe komunitetit lokal. Vetëm përmes këtij bashkëpunimi të qëndrueshëm mund të ndërtohet një administratë efikase dhe e besueshme, që reflekton vlerat dhe prioritetet e qytetarëve të Bashkisë Konispol.
